ඊයේ දිනයේ එනම් 30 වෙනිදා රාජස්තාන් රෝයල්ස් කණ්ඩායම සහ චෙන්නායි සුපර් කින්ග්ස් අතර පැවති තරගය ජයගෙන අයි පී එල් තරගාවලියේ තමන්ගේ පලමු ජයග්‍රහණය ලබා ගැනීමට රාජස්තාන් රෝයල්ස් කණ්ඩායම සමත් වුනා. රාජස්ථාන් රෝයල්ස් කණ්ඩායමට තමන්ගේ ජයග්‍රහණය වෙත යාමට විශාල සහයෝගයක් ලබා දුන්නේ නිතිෂ් රනාගේ දක්ෂ පිතිකරණය සහ වනිදු හසරංග ගේ අති දක්ෂ පන්දු යැවීමයි.
පලමුවෙන් පිටියට පිවිසි රාජස්ථාන් රෝයල්ස් කණ්ඩායම කඩුළු 9 ක් දැවී ලකුණු 182 ක් රැස් කර ගැනීමට සමත් වුනා. නිතිෂ් රනා පන්දු 36ක් ඇතුලත ලකුණු 81 ක් ලබා ගෙන කණ්ඩායමට ප්‍රබල ආරම්භයක් ලබා දුන් අතර යෂස්වි ජයිස්වාල් සහ නායක සන්ජු සැම්සන් අසාර්ථක වූ අවස්ථාවේ පවා ඉනිම ගොඩ නැගීමට ඔහුගේ මේ ලකුණු ප්‍රමාණය කණ්ඩායමට විශාල සහයෝගයක් වුනා. ආර් අශ්වින්ගේ පන්දුවලට දැඩි ප්‍රහාර එල්ල කල රනා, හයේ සහ හතරේ පහර කිහිපයක්ම එල්ල කලා. කෙසේ වෙතත් ඉන්ප්සුව ක්‍රියාත්මක වුණු චෙන්නායි සුපර් කින්ග්ස් කණ්ඩායමේ පන්දු යවන්නන් රාජස්ථාන් රෝයල්ස් කණ්ඩායමට අභියෝගයක් එල්ල කල අතර එහිදි නූර් අහමද් විකට් දෙකක් ලබා ගනිද්දී මතීෂ පතිරණ සහ ඛලීල් අහම්ඩ් තමන්ගේ ග්‍රහණය දැඩි කරමින් රාජස්තාන් රෝයල්ස් කණ්ඩායම ලකුනු 182 කට සීමා කිරීමට සමත් වුනා.
ලකුණු 183 ක ඉලක්කයක් වෙනුවෙන් පිටියට පිවිසි චෙන්නායි සුපර් කින්ග්ස් කණ්ඩායමට ඒ තරම් හොද ආරම්භයක් ලබා ගැනීමට හැකි වුනේ නැහැ. පලමු ඕවරය තුල ඉතා හොදින් පන්දු යැවූ ජොෆ්‍රා ආර්කර්, රචින් රවින්ද්‍රා දවා ගැනීමට සමත් වූ අතර රාහුල් ත්‍රීපති හයේ පහරක් එල්ල කිරීමෙන් පසුව දැවී ගියා. ඉන්පසුව පිටියට පිවිසි රුතුරාජ් ගයික්වාඩ් තමන්ගේ පිල වෙනුවෙන් පන්දු 37ක් ඇතුලත අර්ධ ශතකයක් රැස් කිරීමට සමත් වුනා.
තරගය තුලදී ඉතා හොද පන්දු යැවීමක නිරත වුන වනිදු හසරංග ත්‍රීපති, ශිවම් ඩුබේ, විජේ ශංකර් සහ ගයික්වාඩ් යන පිතිකරුවන් හතර දෙනාම දවා ගත් අතර ඒ සමගම චෙන්නායි සුපර් කින්ග්ස් කණ්ඩායමේ පිතිකරණ බල ඇණිය ක්‍රමයෙන් බිද වැටෙන්නට පටන් ගත්තා.
පන්දු 25ක් ඇතුලත ලකුණු 54 ක් ලබා ගැනීමට අවශ්‍යව තිබූ අවස්ථාවේ බොහෝ දෙනෙක් බලාපොරොත්තු තබා සිටියේ රවීන්ද්‍ර ජඩේජා සහ එම් එස් දෝනි වෙතයි. 19 වෙනි ඕවරයේදී දෝනි එල්ල කල හතරේ සහ හයේ පහර සමගින් අවසන් ඕවරය තුලදී ලබා ගත යුතු ලකුණු සංඛයාව 19 දක්වා අඩු වුනත් අවසන් ඕවරය තුලදී සන්දීප් ශර්මාගේ පන්දුවක් හමුවේ දෝනී දැවි ගියා. ජඩේජා නොදැවී පන්දු 22 කට මුහුණ දී ලකුණු 32 ක් රැස් කර තිබුනත් ලකුණු හයකින් පරාජය වීමට චෙන්නායි සුපර් කින්ග්ස් කණ්ඩායමට සිදු වුනා. මේ ඔවුන් තරගාවලියේ එක පිට ලබා ගත් දෙවන පරාජයයි.
