2025 අයි පී එල් තරගාවලියේ තමන්ගේ දෙවන ජයග්‍රහණය ලබා ගනීමට පංජාබ් කින්ග්ස් (PBKS) කණ්ඩායම සමත් වුනා. ඒ ලක්නව් සුපර් ජයන්ට්ස් කණ්ඩායම (LSG) විකට් අටකින් පරාජයට පත් කරවමිනුයි. මුලින් පන්දුවට පහර දීමට තෝරාගැනීමෙන් පසුව ලක්නව් සුපර් ජයන්ට්ස් කණ්ඩායම කඩුළු 7 ක් දැවී ලකුණු 171 කට සීමා කිරීමට පංජාබ් කින්ග්ස් කණ්ඩායම සමත් වුනා. ඉන්පසුව මෙම ඉලක්කය හබා ගිය පංජාබ් කින්ග්ස් පිල ඕවර තුනක් අතැතිව තරගය ජයග්‍රහණය කිරීමට සමත් වුනා.
මුලින්ම පන්දු රැකීම තෝරා ගත් පංජාබ් කින්ග්ස් පිල, ඉතා හොද ආරම්භයක් ලබා ගනිමින් පලමු ඕවර හය තුලදී විකට් තුනක් ලබා ගත්තේ ලකුණු 39 ක් පමණක් ලබා දෙමිනුයි. අර්ෂ්දීප් සින්හ් විසින් මිචෙල් මාර්ෂ් තමන්ගේ පලමු පන්දුවෙන්ම දවා ගත් අතර ඉතා හොද පන්දු යැවීමක නිරත වුන ග්ලෙන් මැක්ස්වෙල් රිෂාබ් පෑන්ට් ද දවා ගැනීමට සමත් වුනා.
තමන්ගේ කණ්ඩායමේ විකට් කිහිපයක්ම බිදී තිබුන පසුබිමක තරගයේ වගකීම බාර ගත් නිකොලස් පූරන් ඉනිම ගොඩ නැගීමේ බලාපොරොත්තුව සහිතව ආක්‍රමණශීලී ඉනිමක් ක්‍රීඩාකරමින් පන්දු 30 කදී ලකුණු 44 ක් ලබා ගත්තත් අවසානයේ Yuzvendra Chahal ගේ පන්දුවක් හමුවේ ඔහු දැවී ගියා. ඉන්පසුව පිටියට පිවිසි අබ්දුල් සමාද් සහ බදෝනි පන්දු 21 ක් තුල ලකුණු 47 ක් ලබා ගත්තත්, අර්ෂ්දීප් ගේ විකට් දෙකත් සමගින් ලක්නව් සුපර් ජයන්ට්ස් කණ්ඩායම ලකුණු 171 කට සීමා වුනා.
පංජාබ් කින්ග්ස් කණ්ඩායමට තමන්ට ලැබුණු ලකුණු ඉලක්කය හබා යාම විශ්වාසයෙන් යුතුව ආරම්භ කල අතර ප්‍රාබ්සිම්‍රන් පන්දු 23 ක් තුල අර්ධ ශතකයක් ලබා ගැනීමට වඩාත් කැපී පෙනුනා. ලක්නව් සුපර් ජයන්ට්ස් කණ්ඩායම තමන්ගේ දග පන්දු යවන්නන් යොදා ගෙන ඔහුව මැඩ පැවැත්වීමට උත්සාහ කලත් ඉතා දක්ෂ ලෙස ක්‍රීඩා කරමින් දැවී යාමට පෙර පන්දු 34 ක් තුලදී ලකුණු 69 ක් රැස් කර ගත්තා.
ප්‍රාබ්සිම්‍රන් ගේ මේ දක්ෂ ඉනිමත් සමගින් පංජාබ් කින්ග්ස් කණ්ඩායමට පන්දු 59 ක් තුල අවශ්‍ය වී තිබුනේ ලකුණු 62 ක් පමණයි. එතැනින් පසුව තරගයේ පාලනය තමන්ගේ අතට ගත් ශ්‍රෙයස් අයියර්, පන්දු 30 ක් ඇතුලත ලකුණු 52 ක් ලබා ගනිමින් පංජාබ් කින්ග්ස් කණ්ඩායම ජයග්‍රහණය වෙත රැගෙන ගියා.
මෙම ජයග්‍රහණයත් සමගින් තරග ලකූනු සටහනේ මුල් ස්ථාන වල රැදී සිටින රෝයල් චැලෙන්ජර්ස් බෙන්ගලූරු කන්ඩායම සහ දිල්ලි කැපිටල් කණ්ඩායම සමග සමග් වෙන්නට පංජාබ් කින්ග්ස් කණ්ඩායමට හැකි වී තිබෙනවා.
